O GALP Golfo Ártabro Norte lanza,
xunto a todos os GALP de Galicia, a campaña #QuedaCoNosoMar para visibilizar o
labor da xente do mar ante o Covid-19
Esta iniciativa achega valoracións
e datos de primeira man sobre a importancia económica e social do sector e a
situación por provincias galegas.
O sector solicita á cidadanía que
manteña o seu consumo de produtos do mar e así garantir o emprego dunhas
100.000 persoas e o 2% da riqueza galega.
O GALP Golfo Ártabro Norte vén de lanzar, xunto ao
resto de GALP de Galicia, a campaña “Queda na casa, queda co noso mar”,
que utiliza o cancelo #QuedaCoNosoMar, para visibilizar o labor
da xente do mar ante a situación provocada polo coronavirus Covid-19.
A iniciativa achega información de primeira man
sobre a importancia que ten o traballo do sector, tanto a nivel económico e
social. Para iso, o GALP achega diversas voces para reflectir as valoracións e
testemuñas procedentes das distintas actividades do mar (pesca extractiva,
acuicultura, marisqueo a pé, comercios, etc.).
Entre esas voces destaca a do presidente da
Federación Galega de Confrarías, José Antonio Pérez, que recoñece que “son
días moi complicados” para o sector, do que viven directamente 22.000
persoas na nosa comunidade. Sinala que desde a Federación traballan para
defender “a importancia que o consumo de produtos do mar ten para a sociedade”,
así como as características particulares que existen entre as distintas
actividades do mar, como poden ser a pesca e o marisqueo.
Pola súa banda, o presidente da Federación
Nacional de Cofradías de Pescadores, Basilio Otero, asegura que desde o
inicio do estado do alarma o sector do mar, tanto en Galicia como no resto
de España, “reduciu en gran medida a súa actividade, con paróns de ata o
70% da frota nalgunhas autonomías”, provocado pola necesidade de equipos de
protección individuais (EPIs), a caída da demanda doméstica e o peche da
canle Horeca (hostalaría e restauración).
Porén, Otero destaca “a valentía” da xente do
mar que, a pesar da menor actividade, continuou traballando para garantir a
subministración de produtos á cidadanía. Basilio Otero considera que tanto
o peixe como marisco son alimentos que deben chegar aos fogares debido “ao seu
alto valor nutricional e enerxético”.
Situación por provincias galegas
En Lugo, Basilio Otero, presidente da Federación
Provincial de Confrarías, asegura
que a situación “é distinta respecto ao resto de Galicia” debido ás súas
características propias, con sobre todo pesca de altura, baixura e moi pouco
marisqueo, e tamén á maior duración da campaña da cabala. Isto, sumado a unha
lixeira suba dos prezos e do consumo durante a Semana Santa, fixo que a situación
se normalizara un pouco, pero “aínda queda moito que recuperar”, engade.
Na provincia da Coruña, a situación varía en función da confraría, pero
en xeral estanse establecendo quendas de saídas ao mar, xa que debido ao
descenso da demanda, non é preciso que toda a frota estea en activo. O
presidente da Federación Provincial de Confrarías da Coruña, Daniel Formoso,
pide á cidadanía que non deixe de consumir produtos do mar, “xa que a súa
venda non só mantén os empregos directos, senón a toda unha cadea, entre a
que hai empresas conserveiras, depuradoras ou transportistas”. Ademais, reclama
“compensacións” para as persoas que tiveron que parar para cumprir co
decreto de estado de alarma e para as que teñen que vender o produto “con
caídas de prezos de entre o 50 e o 85%”.
En Pontevedra a maior parte da actividade de
marisqueo está paralizada e tanto a pesca artesanal como as lonxas funcionan
ao 60% ou 70% da súa actividade habitual, como destaca Javier Martínez,
secretario da Federación Provincial de Confrarías de Pontevedra. Destaca o
labor da xente do mar, que “é un dos colectivos que primeiro se sensibiliza”
cunha situación como a provocada pola pandemia do Covid-19. Martínez indica
que, “á parte do aspecto económico, a xente do mar tamén está preocupada polo
abastecemento á cidadanía”, de aí que reivindique unha maior atención ás
inquedanzas do sector, especialmente das mariscadoras.
Situación no ámbito territorial
do GALP Golfo Ártabro Norte
Pola súa banda, o presidente do GALP Golfo Ártabro
Norte, José Manuel Fernández Lage, quere resaltar as características tan
peculiares que teñen as 6 confrarías deste territorio, principalmente o seu
tamaño. “Temos Confrarías moi pequenas e con poucos socios e socias, e
en canto á actividade algunhas delas dedícanse exclusivamente ao “marisqueo
a pé”, non tendo outras opcións como vía de escape nestes momentos” “Estamos
parcialmente paralizados e con moi pouca actividade”
Ao non ser
considerado o marisco un produto de primeiro necesidade, non hai demanda para a
súa venda, xurden moitas complicacións
para realizar subastas ou colocar o produto a un único comprador respetando
prezos de mercado, como fan algunhas das nosas confrarías, porque non hai
compradores”, explica.
Nestes momentos “vivir do noso mar e das nosas
rías” non é unha tarefa fácil, agravada polo peche do sector da
restauración.... pero, mentres tanto, reclama para este territorio máis axudas
para soster un sector que dá emprego “ a moitas familias”, e sobre todo que non
desapareza, e que poidan contribuír a impulsar a economía deste ámbito
territorial....e rexurdan no momento que esta “pandemia”, que nos levou a este
“estado de alarma”, desapareza.
Un sector que emprega a máis de
100.000 persoas
A pesca, o marisqueo, a acuicultura mariña e o
sector transformador dos produtos do mar dan traballo na nosa comunidade a
máis de 100.000 persoas de forma directa ou indirecta, e xeran unha riqueza
superior aos 1.100 millóns de euros, o que representa o 2% da riqueza
de Galicia (PIB), segundo datos da Consellería do Mar da Xunta de Galicia.
Esta importancia da pesca é moi superior nalgúns
municipios costeiros, onde a
actividade extractiva, acuícola e transformadora son claves na economía local.
Isto acontece nun de cada cinco concellos costeiros, onde o peso deste
sector achega máis do 10% do seu PIB.
En 2019, nas lonxas e centros de venda de Galicia comercializáronse máis de 158.000
toneladas de produtos da pesca que supuxeron unha facturación de case
470 millóns de euros, segundo o Anuario de Pesca 2019.
O sector do mar non só é un piar estratéxico para
a economía galega, senón que é a actividade produtiva máis característica da Galicia
diante da economía europea.
