«Sente o Mar», iniciativa de turismo mariñeiro de Mugardos, recoñecida no Congreso Internacional de Pesca & Turismo

 

A experiencia de turismo mariñeiro posta en marcha pola mariscadora de Mugardos foi a máis votada na súa categoría durante o encontro celebrado en Sanxenxo.

O traballo e a ilusión de Silvia Coba, mariscadora de Mugardos, recibiron un novo recoñecemento. A súa iniciativa «Sente o Mar» foi distinguida na categoría de turismo mariñeiro no Congreso Internacional de Pesca & Turismo, celebrado en Sanxenxo.

Durante o congreso, Silvia tivo a oportunidade de presentar a súa experiencia xunto con outras propostas relacionadas co turismo mariñeiro. Despois das presentacións, as persoas asistentes participaron nunha votación na que «Sente o Mar» resultou gañadora na súa categoría.

Descubrir o marisqueo da man das súas protagonistas

«Sente o Mar» é unha iniciativa de turismo mariñeiro que xa está en marcha en Mugardos e que permite achegarse ao mundo do marisqueo a pé desde unha perspectiva diferente: a de quen coñece e vive esta actividade cada día.

A través desta experiencia, as persoas participantes poden descubrir as especies da ría, comprender a importancia das mareas e coñecer de primeira man o traballo das mariscadoras, os seus coñecementos e a súa vinculación co territorio.

Unha maneira de poñer en valor non só os produtos do mar, senón tamén as persoas, as tradicións e a cultura mariñeira que forman parte da identidade de Mugardos.

Unha iniciativa nacida da cooperación entre os GALP de Galicia

«Sente o Mar» naceu no marco de «Mar e Rías: Pesca & Turismo», un proxecto de cooperación no que participan os oito Grupos de Acción Local do Sector Pesqueiro (GALP) de Galicia, baixo a coordinación do GALP Ría de Pontevedra.

A través de actividades formativas e outras actuacións, o proxecto busca favorecer a creación de novas oportunidades para o sector pesqueiro mediante o turismo mariñeiro, aproveitando os coñecementos e a experiencia das persoas que traballan no mar.

O propio Congreso Internacional de Pesca & Turismo tamén forma parte desta iniciativa de cooperación e constitúe un espazo para compartir experiencias, intercambiar coñecementos e dar visibilidade a propostas que vinculan a pesca co turismo.

O recoñecemento a «Sente o Mar» é un exemplo das oportunidades que poden xurdir cando a formación e a cooperación se traducen en iniciativas reais, impulsadas polas propias persoas do sector.

Unha experiencia para vivir en Mugardos

Máis alá deste recoñecemento, «Sente o Mar» ofrece a oportunidade de descubrir o marisqueo desde dentro e coñecer unha parte fundamental da nosa cultura mariñeira.

Desde o GALP Golfo Ártabro Norte queremos felicitar a Silvia Coba polo seu traballo e por contribuír a dar visibilidade á profesión das mariscadoras e á riqueza do patrimonio mariñeiro de Mugardos.

Animámosvos a coñecer «Sente o Mar» e a descubrir a ría da man de quen mellor a coñece.

Proxecto de cooperación cofinanciado polo Fondo Europeo Marítimo, de Pesca e de Acuicultura (FEMPA), coa participación da Consellería do Mar da Xunta de Galicia.

O GALP Golfo Ártabro Norte comparte experiencias e proxectos co grupo de desenvolvemento rural e pesqueiro de Ibiza e Formentera

O pasado 7 de outubro recibimos no territorio do GALP Golfo Ártabro Norte a visita do Grupo de Acción para o Desenvolvemento Rural e Pesqueiro de Ibiza e Formentera (GALDREF), interesado en coñecer de primeira man diferentes iniciativas apoiadas con fondos europeos que contribúen ao desenvolvemento do sector pesqueiro e á dinamización do noso territorio.

A xornada permitiu compartir experiencias, coñecer proxectos xa realizados e outros que se están desenvolvendo, e intercambiar ideas sobre as oportunidades que ofrecen as axudas do Fondo Europeo Marítimo, de Pesca e de Acuicultura (FEMPA) para as comunidades costeiras.

Primeira parada: Pontedeume

A visita comezou en Pontedeume, onde o grupo foi recibido pola concelleira de Turismo, Promoción Económica e Emprego, Ángela Piñeiro, e polo primeiro tenente de alcalde e alcalde en funcións, José Simoes Couceiro.

Durante o encontro presentáronse diferentes iniciativas impulsadas polo Concello, entre elas o proxecto «Saberes e Sabores de Pontedeume», que contempla a creación dunha ruta mariñeira pola vila e accións formativas dirixidas ao sector pesqueiro e marisqueiro, co obxectivo de poñer en valor o patrimonio e a cultura vinculados ao mar.

O grupo tamén visitou a Panadería Patricio, un exemplo de como os investimentos apoiados polo GALP poden seguir dando lugar a novas iniciativas. Neste caso, coñeceron a aposta do establecemento por incorporar produtos do mar, como as algas, a novas elaboracións.

Ferrol: patrimonio mariñeiro e proxectos vinculados ao sector pesqueiro

A seguinte parada foi Ferrol, onde a delegada territorial da Xunta de Galicia, Martina Aneiros, deu a benvida aos participantes e destacou a importancia de Ferrol e da súa ría no territorio do Golfo Ártabro Norte.

Pola súa parte, Gabriela Bustabad, técnica de fondos europeos do Concello de Ferrol, explicou diferentes proxectos desenvolvidos para achegar o sector pesqueiro á cidadanía e contribuír á conservación e difusión do patrimonio mariñeiro da cidade.

Entre eles destacou «Nós Mariñeir@s», unha iniciativa centrada na posta en valor da identidade e da memoria mariñeira de Ferrol Vello, un barrio historicamente vinculado á actividade portuaria e pesqueira.

Coñecendo o traballo da Confraría de Pescadores de Ferrol

A xornada continuou cunha visita á lonxa e ás instalacións da Confraría de Pescadores de Ferrol, onde o patrón maior, Gustavo Chacartegui, acompañou ao grupo para amosarlle diferentes investimentos realizados co apoio do GALP.

Entre eles, a peixería situada na planta baixa da confraría, que permitiu incorporar a venda directa de produtos pesqueiros ao público, convertendo a entidade na primeira confraría do ámbito do Golfo Ártabro Norte en contar con este servizo.

Os participantes tamén coñeceron a aula mariñeira de formación e a depuradora, instalacións que contribúen a mellorar os servizos da confraría e a apoiar a actividade do sector.

Esta parte da visita permitiu coñecer de preto o traballo que desenvolven as confrarías e a importancia dos investimentos destinados á mellora das súas instalacións e servizos.

Compartir experiencias para seguir aprendendo

A visita do GALDREF foi unha oportunidade para mostrar o traballo que se está desenvolvendo no noso territorio e, ao mesmo tempo, intercambiar experiencias con representantes doutras zonas costeiras.

Desde o GALP Golfo Ártabro Norte valoramos especialmente estes encontros, que permiten coñecer outras realidades, compartir iniciativas e seguir aprendendo de proxectos que teñen un obxectivo común: apoiar o sector pesqueiro, poñer en valor o patrimonio mariñeiro e contribuír ao desenvolvemento dos nosos territorios.

💙 Grazas ao GALDREF pola visita e a todas as persoas e entidades que participaron na xornada e nos acompañaron para dar a coñecer estes proxectos.

Diego Pérez Martínez: unha vida vinculada ao mar e á pesca en Pontedeume

O patrón e armador da Confraría de Pescadores de Pontedeume protagoniza un dos vídeos da campaña audiovisual do proxecto de cooperación «Relevo Xeracional: O Futuro do Mar», unha iniciativa que busca achegar os oficios do mar á cidadanía e, especialmente, á mocidade.

O mar forma parte da vida de moitas familias do noso territorio. Detrás de cada embarcación hai persoas que, co seu traballo diario, manteñen viva unha actividade fundamental para a economía e a identidade das nosas comunidades costeiras.

Nesta ocasión queremos achegarvos a historia de Diego Pérez Martínez, patrón e armador dunha embarcación de pesca da Confraría de Pescadores de Pontedeume, que comparte a súa experiencia e nos permite coñecer un pouco mellor a realidade do traballo no mar.

A través do seu testemuño descubrimos o seu vínculo coa pesca, como é o día a día desta profesión e a importancia de dar a coñecer estes oficios ás novas xeracións.

Historias reais para achegar os oficios do mar á mocidade

Este vídeo forma parte da campaña audiovisual do proxecto de cooperación «Relevo Xeracional: O Futuro do Mar», que recolle experiencias de persoas vinculadas ao sector marítimo-pesqueiro.

A iniciativa busca darlles voz ás persoas que traballan no mar, poñer en valor os seus coñecementos e mostrar á mocidade as posibilidades profesionais que ofrece un sector no que conviven tradición, experiencia e novas oportunidades.

Convidámosvos a descubrir a historia de Diego, a súa experiencia e o seu vínculo co mar. Porque detrás de cada oficio hai persoas e historias que paga a pena coñecer.

Un proxecto de cooperación dos GALP

«Relevo Xeracional: O Futuro do Mar» é un proxecto de cooperación no que participamos os oito Grupos de Acción Local do Sector Pesqueiro (GALP) de Galicia, coa colaboración do GALP do País Vasco e baixo a coordinación do GALP Ría de Arousa.

Desde o GALP Golfo Ártabro Norte participamos nesta iniciativa compartida para contribuír a dar visibilidade ás profesións do mar e favorecer o achegamento da mocidade ao sector pesqueiro.

Proxecto de cooperación financiado pola Consellería do Mar da Xunta de Galicia no marco do Fondo Europeo Marítimo, de Pesca e de Acuicultura (FEMPA).

O GALP Golfo Ártabro Norte coordina “Feito co Mar”, un proxecto para transformar ideas en novas oportunidades

O GALP Golfo Ártabro Norte coordina “Feito co Mar – Transformación e valorización do produto pesqueiro”, un proxecto de cooperación no que participan sete GALP de Galicia para fomentar o emprendemento e a creación de novas actividades económicas arredor dos produtos do mar.

Xunto ao GALP Golfo Ártabro Norte, como grupo coordinador, participan no proxecto o GALP Golfo Ártabro Sur, GALP A Mariña Ortegal, GALP Costa da Morte, GALP Costa Sostible, GALP Ría de Arousa e GALP Ría de Pontevedra.

A iniciativa pon o foco nas posibilidades que ofrece a transformación e valorización do produto pesqueiro, desde elaboracións como conservas, salgados, afumados, adubados, desecados ou patés ata pratos elaborados, prestando especial atención ás prácticas de carácter artesanal.

Viveiros para aprender, experimentar e emprender

Para avanzar neste obxectivo, Feito co Mar porá en marcha en 2027 os Viveiros Formativos de Emprendemento, con dous programas de formación —un de iniciación e outro de profesionalización— cun enfoque eminentemente práctico e experimental.

As persoas participantes poderán achegarse aos procesos de transformación e elaboración do produto pesqueiro e experimentar coa creación de novos produtos, como conservas ou pratos de V gama. A formación abordará tamén cuestións relacionadas coa normativa, as boas prácticas, as técnicas e procesos de elaboración, o envasado e a etiquetaxe, ademais de incorporar contidos de emprendemento e acompañamento ás iniciativas que vaian xurdindo.

A formación estará dirixida por Carme Freire, de Daquí darredor, e completarase con titorización e apoio aos proxectos participantes.

Escoitar o territorio antes de comezar

Pero Feito co Mar xa está en marcha no territorio.

Como parte dos traballos iniciais, desde o GALP Golfo Ártabro Norte xa presentamos o proxecto ás seis confrarías do noso territorio e mantivemos reunións cos concellos, co obxectivo de coñecer as súas necesidades e propostas e contribuír a adaptar os contidos e a proposta formativa á realidade da zona.

Estes encontros permiten tamén explorar a implicación dos concellos na dinamización dos Viveiros e na creación de futuros Espazos de Traballo Colaborativo, orientados á transformación do produto pesqueiro e ao desenvolvemento de novas iniciativas.

Presentación do proxecto de cooperación “Feito co Mar” na Confraría de Pescadores de Miño, no marco dos encontros mantidos polo GALP Golfo Ártabro Norte coas confrarías do territorio.

Novas oportunidades arredor dos produtos do mar

Nas próximas semanas continuará a presentación de Feito co Mar no territorio, de cara á posta en marcha dos programas formativos previstos para 2027 e á captación de persoas e iniciativas interesadas en participar.

O proxecto está especialmente dirixido ao sector da pesca, do marisqueo e da acuicultura, aínda que as súas actividades tamén poden resultar de interese para alumnado de Formación Profesional, persoas participantes en programas municipais de emprendemento, asociacións empresariais ou persoas desempregadas interesadas en explorar novas oportunidades arredor dos produtos do mar.

Ademais dos Viveiros Formativos, Feito co Mar traballará na creación de Espazos de Traballo Colaborativo, coa posta en marcha en 2027 dunha experiencia piloto e o deseño dunha proposta de rede entre os territorios participantes.

A través da formación, a experimentación e o acompañamento, o proxecto busca contribuír á valorización da actividade pesqueira e ao relevo xeracional, favorecendo a aparición de novos negocios e actividades económicas vinculadas á transformación dos produtos do mar.

“Feito co Mar” é un proxecto de cooperación cofinanciado pola Unión Europea e pola Consellería do Mar da Xunta de Galicia a través do Fondo Europeo Marítimo, de Pesca e de Acuicultura (FEMPA).

Coñecer outras experiencias para construír o futuro do mar

 O relevo xeracional é un dos grandes retos aos que se enfronta o sector marítimo-pesqueiro. Coñecer experiencias que xa están a traballar neste ámbito, compartir aprendizaxes e descubrir novas formas de achegar a mocidade aos oficios do mar é tamén unha maneira de avanzar.

Con este obxectivo, no marco do proxecto de cooperación “Relevo Xeracional: O Futuro do Mar”, participamos do 28 de setembro ao 2 de outubro nunha visita de estudo ao País Vasco, unha oportunidade para coñecer de primeira man diferentes iniciativas relacionadas co presente e, sobre todo, co futuro do sector.

Durante estes días achegámonos a experiencias vinculadas á formación, á innovación e á investigación, á incorporación de novas xeracións ao sector pesqueiro e á transmisión da cultura e do patrimonio marítimo.

A visita levounos por diferentes espazos e entidades, como Kofradia Basque Seafood, a Escola de Pesca e a Lonxa de Ondarroa, AZTI, Albaola, OPEGUI e o Itsas Museo de Donosti, coñecendo iniciativas que abordan o relevo xeracional desde perspectivas diferentes pero complementarias.

Formación, innovación e novas oportunidades

Un dos aspectos máis interesantes da visita foi precisamente comprobar como a formación, a experiencia práctica e a conexión directa co sector poden desempeñar un papel fundamental á hora de achegar a actividade pesqueira ás novas xeracións.

Tamén puidemos coñecer iniciativas relacionadas coa investigación e a innovación, a valorización dos produtos do mar, a divulgación da actividade pesqueira e a conservación e transmisión do patrimonio marítimo.

Compartir experiencias para seguir avanzando

As visitas de estudo permiten coñecer outras realidades e, sobre todo, intercambiar experiencias con persoas e entidades que afrontan retos moi similares aos nosos.

Porque falar de relevo xeracional non é só falar da incorporación de xente nova. É tamén falar de formación, oportunidades profesionais, innovación, transmisión de coñecementos e da necesidade de mostrar todo o que o sector marítimo-pesqueiro pode ofrecer ás novas xeracións.

Esta visita forma parte de “Relevo Xeracional: O Futuro do Mar”, un proxecto de cooperación no que participan todos os GALP de Galicia, coordinado polo GALP Ría de Arousa, e que conta coa colaboración do GALP vasco Itsas Garapen Elkartea, entidade anfitrioa durante esta visita.

Volvemos desta experiencia con novas referencias, aprendizaxes e ideas para seguir traballando tamén desde o Golfo Ártabro Norte para achegar a mocidade ao sector e contribuír á continuidade das nosas comunidades costeiras.

Proxecto financiado pola Consellería do Mar no marco do Fondo Europeo Marítimo, de Pesca e de Acuicultura (FEMPA).